Urteko lema

# 2019-2020 ikasturteko goiburuaren kartelaren azalpena: “IMAGINA-IMAXINA-IMAJINATU -IMAGINE”

La Salleko Joan Bautistaren heriotzaren hirugarren mendeurrenean oraindik murgilduta, salletar bidean aurrera goaz. Berak ereindako hazia gara. Aurten, ikasturte honetan, pertsonaren sen sakonetako batetik abiatuko gara; ametsen, ilusioen eta gure fundatzaileak orain dela 300 urte irudiztatu zuena bezalako ekintzen iturburu den sen sakona.

 – SORMENA-

“IRUDIMENAREN AHALMENAK MUGAEZINAK EGITEN GAITU”

(John Muir)

Askotan miresgarritzat jotzen dugu gure fundatzaileak egitasmo handiak garatzeko erakutsi zuen gaitasuna. Imajinatzeko ahalmena, sormena azken finean, La Salleko Joan Bautistaren ezaugarri propioa izan zen. Kartel honekin, hain zuzen ere, irudimen edo imajinazioaren aldea irudikatu nahi dugu… ziurrenik, hortik hasita, imajinazioaren aldean ibilita, Joan Bautista doneak bere proiektu handiena gauzatuko zela amestu zuen.

Kartel honek daukan ezaugarri deigarriena zera da, formatu dinamikoan eginda dagoela. Kartela birakaria da: erdiguneko elementuak, kiribil batek, espiralak, ikasturtearen goiburua agerian uzten du (IMAJINATU). Hiruhileko bakoitzean kartelaren osagarri zehatz bat landuko da; biraketak egingo direnean ere (gelditasunaren ideia hautsiz) goiburua erraz irakurri ahalko da eta horrela mugaketarik ez duen irudimenaren kontzeptua azpimarratuko da:

– LEHENENGO HIRUHILEKOA: Harridura marka (!) Pentsaera dibergentea garatzera gonbidatzen gaitu, baita erantzun berriak aintzat hartzera ere, eta egiteko eta jokatzeko era berriak, hautabide anitzak landuz.

– BIGARREN HIRUHILEKOA: Etenpuntuak (…) Pentsaera hedakorraz baliatzea proposatzen digute. Sortuko ditugu, horrela, beste ideia batzuetatik datozen ideia berriak, iritzia ematearen atzerapena landuz eta elkarfluxua areagotuz.

– HIRUGARREN HIRUHILEKOA: Galdera-marka (?)Galderak egitera bideratzen gaitu: imajinatzen al duzu? Beste errealitate bat aurkitzera eta ikusteko beste gisa bat edukitzera eramaten gaitu… Galderek eredu egonkorrak eta aurre suposizioak gainditzen laguntzen digute.

 

Kolore leherketa den kartel honetan beste elementu batzuk aurkituko ditugu:

– Atzealdea. Akuarelazko orban batzuez osatuta dago; kolore hotzetako orbanak: itsas urdinak, ura-berdeak, zeru-kolorea, turkesak… Tonu hauetako orban horien guztien artean ezkutatzen diren elementu batzuk aurki ditzakegu… eta, nola ez, norberak ikusiko eta imajinatuko duena ere bai. Kartelaren atzealdeak ikuslearen irudimena esna dezake, hainbeste eta hainbeste aukerentzako bidea irekiz.

– Kiribila (espirala). Kartelaren sinbolo nagusia da. “IMAJINATU” Arlep barrutiko hizkuntzatan idatzita dago, guztien eta guztientzako kartela lortuz.

-Osagarri horiak. Ezinbestekoak dira kartel salletar batean. Asko dira hemen kolore honetakoak. Erdigunean leiho baten ingerada daukagu, eta muturretan bi eskailerena. Bi elementu hauek, leihoa eta eskailera, leku berrietara pasatzeko erabilgarriak dira… irudimenaren ateak, ezohiko tokietara eramango gaituen eskailera, beste munduetarako leihoak, itxaropen eta ilusio berriak.

Eskailerak dauden lekuetatik beste aldeko muturretan izarren estelak ikusiko ditugu. La Salleko izarrak dira: imajinazioaren zurrunbiloan proiektu berrietarako bidea erakusten digutenak. Estela hauekin batera gure bizi kristau eta salletarra irudikatzen duten beste sinbolo batzuk ere baditugu: tximeleta (pastoralaren ikurra), gezia (salletar bakoitzaren bide pertsonala irudikatzen duena), lehengokoek gugan utzitako aztarnak eta guk besteengan utziko ditugunak… eta bihotza. Bihotza da, hain zuzen ere, gure ekintza guztiak bideratzen dituena; eta La Salleko Joan Bautista maitasunaren proiektu handi honetan sartzera eraman zuena (lagun hurkoarekiko, txiroekiko, umeekiko, gazteekiko, Jainkoarekiko maitasuna… maitasunak bakarrik bilakatzen zaitu besteentzako eskaintza, oso-osorik eta beldurrik gabe).

Gure ibilera irudimenaren esku uzteko prest al gaude? Imajina ezazu amesten duguna benetan lortzen dugula! Imajinatzen al duzu nola amestu zuen gure fundatzaileak oraingo honetaraino iristea? Imajina ezazu 300 urte hauek aurrean ditugun milaka urteen hasiera besterik ez direla…

Imajina ezazu inoiz amaituko ez den proiektua garela; imajina ezazu orain dela 300 urte dirdira egin zuen eta inoiz itzaliko ez den izarra garela.

Irudimenarekin dena lor daiteke…

“IRUDIMENAK GUGAN DUEN ERAGINA, ERREALITATEARENA BAINO ASKOZ HANDIAGOA DA”

(Jean de la Fontaine)

 

IMAGINA-IMAXINA-IMAJINATU-IMAGINE!